مصر هي اوضتي

انهاردة بس استلمنا مصر في ادينا ... وللأسف مش متشطبة وعالمفتاح ..
مصر انهاردة تركة تقيلة لازملها رجالة واعية وفاهمة مش هاينفع الهطل اللي كنا عايشين فيه ده بقالنا تلاتين سنة مش هاينفع نهمش بعض تاني مش هاينفع نهين افكار بعض ومانسمعش لبعض .
انهاردة كل القوى السياسية لازم نعرف حجمعا كويس ولازم نتعامل معاها بعيد عن ثقافة الزعيق والتخوين والتهكم لان القوة انهاردة بقت فالشارع مش فالتليفزيون ولا فأيد الحكومة زي زمان كنا نخاف من السلفيين نجري عالحكومة امسك ارهابي هوبا عالمعتقل وننسا اشكالهم بالسنين وكذلك الاخوان المسلمين انهاردة يا حبيبي مافيش منده تاني انهردة فكرتك في دماغك وقلمك فايدك ومنطقك فلسانك هاتعيش وتكبر وتنزل الملعب يا حلو ... هاتزعق وتحشد وترمي بلاك هايبقى مصيرك المدرجات دا لو طولتها ...
السياسة انهاردة بقت على عينك يا تاجر مافيش حد حايحوش عنك حد زي زمان ولا ابواب اعلام فاشل يديك اكبر من قيمتك ... قيمتك الحقيقية هاتبان مع اول اختبار قدام الصندوق يا تبقى محترم والناس تقتنع بيك  يا اما تاخد على قفاك وتروح تعيط فالقنوات اللي تبعك ودا طبعا بيبقى باين جدا على قفاك وانت وشك منفوخ وطالع تبرطم اشي تزوير واشي الدين فالسياسة على برجماتية ومهلبية وفالاخر الصندوق هو اللي بيحكم طالما الانتخابات نزيهة.
نشوفكوا بعد الفاصل